Къыйметли табиат достлары!

Мына, сиз энди учюнджи сыныф талебелери олдынъыз. Дерслигимиз сизни бу вакъиа иле хайырлап, табиатшынаслыкъ дерслерине давет эте. Сиз бутюн яз девамында раатланыр экенсинъиз, дерслик сизге этрафтаки алем акъкъында пек чокъ янъы, меракълы ве файдалы шейлерни икяе этмек ичюн азырланды.

Затен, сиз компьютерлернен, джеп телефонлары ве дигер земаневий техниканен зияде меракълангъанынъызны бильсек де, умют этемиз ки, табиатшынаслыкъ дерслерини де бегенедирсинъиз. Шунынъ ичюн де бизим эсас вазифемиз - инсан ичюн табиат техникий енъишлерден де муимдже олгъаныны эр биринъизге анълатмакътыр. Чюнки инсан ве табиатны бири-дигеринден айырмакъ мумкюн дегиль. Биз анджакъ табиат къанунларыны яхшы бильгенимиз ве урьмет эткенимиз такъдирде Ер сейяре деп адландырылгъан умумий эвимизде тынч-раат, бахтлы омюр сюрип олурмыз.

Табиатнынъ эр бир акъикъий досту оны тедкъикъ этмеге тырышкъаныны унутманъыз. Ойле экен, суаллер бермеге къоркъманъыз. Дерслик ярдымынен джевапларны мытлакъа тапарсынъыз.

Бунынънен берабер биз бу йыл Табиат акъкъында муим бильгилер китабыны язып башлайджакъмыз. Эм эр бир корюшювимизде бу китапкъа янъы саифелер къошаджакъмыз.

Иште, ёлгъа чыкъайыкъ, достлар, Ана-Табиат але-мини бирликте кешф этейик!